Maga autoridad ya aresta tres personas y confisca tres milyon cuarenta’y sinco mil cantidad de cigarillos durante el campaña contra contrabando na provincia del Zamboanga Sibugay.
Asegun con Coronel Richard Verceles, el operations chief del Area Police Command-Western Mindanao, cay con el tres arestao personas ya conose como canda Ian Joven Cabreros, Abdel Khaliq Ong, y si Francho Gonzales.
Asegun con Verceles cay con el tres personas ya aresta el combinado grupo del pulisiya, militar y personajes del Buro de Aduana durante el campaña contra contrabando maga alas tres del martes tarde na Barangay Baluran, Tungawan, Zamboanga Sibugay.
Si Verceles ya habla cay ni uno de ila tres nohay puede presenta documento del ochenta’y siete cahon de cigarillo cargao na trak que ta maneja si Cabreros.
Con el tres arestao personas ya lleba na quartel del pulisiya na municipio de Tungawan para el documentacion myentras con el trak y maga cigarillo ya entrega na custodiya del Buro de Aduana. (Bong Garcia, Jr., photo courtesy of Bureau of Customs)