Dos personas el irido y admitido na hospital despues que ya man banggaan el un motorsiclo y un jeep na carretera del Maria Clara Lorenzo Lobregat (MCLL) aqui na ciudad, asegun con el policia local del Viernes.
Asegun con el policia local, el accidente ya ocuri mga alas 2:20 del Viernes aga na carretera del MCLL na Barangay Victoria, en este ciudad.
El policia ya nombra con el dos victima como canda Jeck Capec, 27 años el edad y el chufer del motorsiclo y su ancas si AJ Danda, 19, ambos mga residentes de Barangay Sangali, en este ciudad.
Base na investigacion, canda Capec ta viaja para na Barangay Sangali desde Barangay Victoria cuando ya man bangga sila con un jeep que ta maneja si Arnold Sampillio, 42 años el edad.
Si Sampillio, quien nohay sinti duele, ta viaja para na direccion del pueblo estaba na Barangay Curuan durante el accidente.
Con Capec y Danda, quien alegaomente tomao durante el accidente, ya lleva na hospital para el tratamiento medical. (B. Garcia)