El policia ay designa 112 personajes para sirvi como mga miembros del “Special Electoral Board (SEB)” na benedero “Barangay and Sangguniang Kabataan Elections (BSKE)” na tres municipio y tres barrio de un ciudad na provincia de Basilan, asegun con un alto oficial pulis del Jueves.
Ese el cosa ya reporta si Police Colonel Carlos Madronio, el Basilan Police Director, durante el Provincial Peace and Order Council Meeting que ya encabesa el Governador Jim Hataman-Salliman del Basilan de este dia de Jueves.
Asegun con Madronio, el 112 personajes del policia as sirvi como miembros del SEB na municipio de Al-Barka, Tabuan-Lasa, y na Ungkaya Pukan y tres barrio na ciudad de Lamitan.
Asegun con Madronio, no quiere sirvi mga maestro y maestra na dia de eleccion na Octubre 30 por causa de amenaso de seguridad.
El causa del amenaso na seguridad amo el existencia del peleya entre man familia na tres municipio y tres barrio na Lamitan.
Mientras tanto, el policia ay designa 490 personajes para guadia con el conducida de BSKE na Basilan na Octubre 30.
Demas temprano, el militar ya designa ya omento soldao para guardia con el BSKE na Basilan.
El mga soldao estaba desde’l provincia de Sulu y Bulacan.
(B. Garcia, photo courtesy of Basilan Provincial Information Office)