Gitawag nga “disaster in waiting” sa pamunuan sa General Santos City-Waste Management Office ang sitwasyon sa sanitary landfill sa Barangay Sinawal.
Sa pakighinabi kang WMO head, Ferdinand “Nonoy” Pareja, gikabalak-an sa opisyal nga posibleng taman na lamang karong bulan sa Disyembre ang operasyon sa landfill gumikan sa dugay nang anaa sa overcapacity ang maong basurahan.
Gikabalak-an pa sa opisyal nga gumikan sa natala nang kalapasan sa environmental laws, posibleng mag-atubang na og kaso ang city government.
“Kung walay klaro nga lakang, imbes nga matawag na nga “sanitary landfill” mahimo na siyang “dumpsite”. Pasabot, kung ipatuloy nato nga labayan, mabalik ta sa open dumping, so bawal na, makasuhan na ta. Until December kung walay klaro nga solusyon, ing-ana na na siya, mapilitan ta. Usa ka opsiyon ana, magpa-undang gyud ta (koleksyon sa basura),” ang tipik sa pagpangandam ni Pareja.
Tuig 2016 sa dihang gi-inagurahan ang ₱ 219-million sanitary landfill project ug base sa orihinal nga plano, aduna lamang tulo ka tuig ang lifespan sa gimuntar nga “selda”, gani, duha na ka tuig nga lampas sa kapasidad ang landfill.
Sa karon, natanggong pa sa Sangguniang Panlungsod ang ₱ 1,945,315.00 nga proposed loan application sa city government tali sa Land Bank of the Philippines, diin, anaa sa ₱ 500-million niini ang natagana alang sa Sanitary Landfill Project sa siyudad.
Ilawom sa budget proposal, plano ang pagpalit og duha ka backhoe with dozer blade, duha ka sweepers, duha ka payloader, 17 ka dumptruck ug 10 ka “compactors” alang sa garbage collection.
(John Rey Somido, photo courtesy of GenSan LGU Facebook page)