Sarangani Province – Andam na ang Department of Education Division of Sarangani sa pag-abri sa klase karong adlawa, adlaw nga Lunes, Septembre 13, alang sa bag-ong school year 2021 to 2022. Segun ni SDS kon Schools Division Superintendent Gildo Mosqueda, ikaduha na kini nga school year nga wala usa gyud gitugutan sa gobyerno nga makapahigayon og face-to-face nga pagklase.
Sa datus sa DepEd Sarangani as of September 9, nikabat na sa 142,053 kabuok mga kabataan ang nagpa-enrol entiro Sarangani Province gikan elementarya, junior high school ug senior high school. Posible pa kining madugangan gumikan andam mudawat ang DepEd bisan nagsugod na ang pag-eskwela tungod sa nagpadayon nga pandemya. Niaging school year 2020 to 2021, niabot og 150,146 ka mga estudyante ang naka-enrol sa Sarangani. Dungan sa pag-abri sa bag-ong school year ang pag-arangkada usab sa upat (4) ka istasyon sa radyo nga gipanag-iyahan sa upat ka eskwelahan, sa pagtabang pud sa komunidad ug lokal nga gobyerno.
Gilangkuban sa Tamban FM nahimutang sulod sa Tamban National High School sa Barangay Tamban, Malungon; ang James Radio sa James L. Chiongbian National Trade School sa Kling, Kiamba; ang Key Radio sa D. Gimarino Elementary School sa Kayupo, Kiamba; ug ang I-Care Radio sulod sa Alegria National High School sa Alegria, Alabel. Anaa pud ang One Malungon Radio Subida FM nga gipadagan sa LGU Malungon sa pamunuan ni Mayor Tessa Constantino ug sa mga magtutudlo sa Malungon.
Mapasalamaton sila Principal Marvin Lim, Principal German Piamonte ug School Head Jerome Reynes sa ayuda sa Kapitolyo sa Sarangani, hilabi na sa opisina ni Governor Steve Chiongbian Solon sa iyang Sulong Karunungan program aron mukusog pa ang ilang gitukod nga school radio station, sa pakig-alayon sa NTC-National Telecommunications Commission Region 12, pabor sa mga bata nga nagtungha dili lang sa ilang eskwelahan kundili kutob sa mga barangay nga maabot sa ilang signal. Sa pagsuporta kana nila Vice Governor Elmer De Peralta, tanang board member, mga mayores, bisan na nila Senador Manny ug Congressman Ruel Pacquiao.
Napamatud-an sa mga magtutudlo, mao puy ingon nila School Head Andy Mataganas, nga dili kaayo madak-an og gasto sa pag-printa sa mga materyales kung ang gamiton nga pamaagi sa pagtudlo mao ang RBI kon radio-based instruction. Matudluan na ang mga bata sa pagtubag sa mga learning activity sheet, madunggan pa nila ang aktwal nga tingog ug lecture sa ilang teacher. Duha (2) ka klase ang RBI: kanang madunggan sa radio station, ug ang “plug and play” gamit ang USB. Ipansak lang ang USB aron madunggan sa mga magtutungha ang recorded lecture sa ilang magtutudlo.
Dako ang kalipay ni Teacher Incharge Benito Tumandan Jr. sa Kiahe Integrated School, bukid na nga eskwelahan sa Kinam, Malapatan nga usa ang iyang eskwelahan nga nakadawat og mga USB/flash drive ug mga transistor radio para libre mahatag ngadto sa mga estudyante. Gikan kana sa Sulong Kabataan program ni Governor Solon, Congressman Pacquiao, ug sa inisyatibo sa mga kabatan-unan sa Sarangani Province partikularminte sa grupo nga Charitable Maitum ug Zero Hunger Alabel gitawag nga “Radyo Para sa Baryo.”
(Source: Sarangani PIO)