Nakaangkon na usab og bag-ong ambulansya ang Sarangani Provincial Hospital gikan sa Department of Health Region 12 sa pamunuan ni Regional Director Aristides Tan. Type 2 ambulance kini nga kumpleto na sa mga kagamitan dili lang alang sa basic life support kundili sa advance life support. Gidawat kini mismo ni Doctora Aileen Brion, ang chief of hospital sa Sarangani Provincial Hospital.
Una na nga gibutyag ni Board Member Irish Arnado sa SP Committee on Health nga dakong tabang ang dungag ambulansya tungod nagsilbi na nga provincial COVID-19 isolation center ang Sarangani Provincial Hospital gikan pa sa pagsugod sa pandemya, sa kamanduan kana ni Governor Steve Chiongbian Solon.
Sa pikas nga bahin, extended pa hangtud karong adlaw nga Biyernes, ugma, Disyembre 4, ang Measles-Rubella Supplemental Immunization Activity aron tagaan og higayon ang mga LGU nga wala pa nakakuha sa target sa Department of Health nga 95 percent coverage rate.
Sa tibuok Sarangani Province, ang munisipyo na lang sa Kiamba ang wala pa kaabot og 95 percent coverage rate basi sa datus sa PHO Sarangani niaging adlaw nga Martes. Samtang, sa entiro Rehiyon Dose, Sarangani Province ang unang nakakab-ot og 95 percent coverage rate sa mao nga nagpadayon nga pagbakuna kontra tipdas ug rubella, gisundan kagahapon sa South Cotabato. Hinungdan nga dako kining gikalipay ni Governor Solon kauban ang mga mayor.
Sa mga panahon sa pandemya, walay laing hinagiban ang lawas gawas sa pag-ampo kundili ang lig-on nga resistensya, matabangan pinaagi sa mga bakuna. Kumplikasyon sa mga balatian nga pwedeng ikamatay sa bata kung dili kini mabakunahan batok tipdas.
(Provincial Information Office – Sarangani)