Cebu City – Dili una modawat og mga international flights nga nagkarga og ROFs o returning overseas Filipinos ang Mactan Cebu International Airport sud sa duha ka adlaw.
Atol sa virtual press conference, si Gob. Gwendolyn Garcia mianunsyo nga ang quarantine hotels nga temporaryong gisak-an sa mga ROFs samtang nagpaabot sa resulta sa swab test hapit na mapuno.
Tungod niini, matod ni Garcia, ang kadagkoan sa airport ug mga ahensiya sa gobyerno nakahukom pagsera lang una sa Terminal 2 sa MCIA karon Mayo 14 ug ugma Sabado, Mayo 15.
Lakip sa mitambong sa emergency meeting sa Kapitolyo si Director Jaime Bernadas sa DOH 7, ug mga opisyal sa DILG o Department of Interior and Local Government sama kang Usec. Epimaco Densing, III ug region 7 director Leocadio Trovela.
Gitug-an ni Garcia nga ang Sugbo adunay 2,500 ka quarantine rooms sa 35 ka hotels nga accredited sa DOH isip holding areas sa mga ROFs samtang maghuwat sa resulta sa RT-PCR test.
Apan matod sa gobernador, kadaghanan sa mga lawak okupado natungod sa kadaghan sa ROFs nga miagi sa Cebu samtang nagpaingon sa ilang tagsatagsa ka probinsiya. (Jhon Tadlip/JTY)
(News & photo courtesy of Cebu Provincial Governor)