Naalarma ang kapulisan sa Alegria, Surigao del Norte dihang kalit midagan ang single cab patrol car niini nga giparking atubangan sa ilang police station samtang mikanaug ang driver, misulod sa opisina aron mangihi.
Sumala pa ni Lt. Col. Rudy Elandag, Deputy Provincial Director for Operations sa Surigao del Norte Police Provincial Office sa interview sa Radyo Ronda Balita, Abril 4 sa gabii samtang gikan nag-patrolya ang kapulisan, pagbalik nila sa police station, giparking sa driver an patrol car nga nag-andar. Kalit lang nga ang suspetsado nga didto nag-standby sa may payag-payag misakay sa patrol car ug gimaneho kini padagan paingon sa direksyon sa Placer.
Ang guwardiya sa kapulisan mialarma sa ilang kaubanan ug ila kining gigukod. Bisan sa singgit sa paghunong, wala kini panumbalinga sa suspetsado nga driver. Hangtud milabay kini sa Bacuag ug sa unahan gibangga ang barikada sa 2nd Provincial Mobile Force Company. Gipusil sa kapulisan ang likod nga mga ligid niini aron mohunong apan nagpadayon gihapon kini sa pagdagan. Gihimo ang coordination sa 30IB Army checkpoint sa Mahanub, Gigaquit hangtud nga didto na kini moundang sa may Parang ug didto siya nadakpan. May bun-og ang suspetsado sa iyang bukton ug gilayon kini gipatambalan sa Gigaquit District Hospital dajon gidala sa Caraga Regional Hospital ug pagkahuman gikustodiya sa Alegria Municipal Police Station. Ang patrol car anaa pa sa Gigaquit Municipal Police Station.
Ang suspetsado nailhan nga si Kim Bachiller Tabar, 30 anyos na may live-in partner, driver mechanic sanan taxi driver na taga Sitio Sacred Heart, Cebu City. Sumala pa nga sa wala pa mahitabo ang carnapping, gikan gi-imbestigar ang suspek sa presinto sa kapulisan tungod sa kagubot nahitabo sa Alegria Integrated Bus Terminal ug gireklamo sa usa ka bus conductor. Human sila magkahusay sa police station ug milakaw na ang conductor, ang suspek nagpabilin nga nag standby sa gawas sa police station. Dihang iyang nakita ang patrol car nga giparking sa driver nga nag-andar, iya kining gipulihan pag-drive ug gipadagan sa regular nga kakusgon.
Ang suspetsado gikasuhan ug carnapping samtang gipasidan-an ni Elandag ang kapulisan nga dili ibilin ang yawe ug dili biyaan ang patrol car kon kini nag-andar samtang nagparking. (RPN DXKS Surigao)
