Surigao: Kontrata sa syudad na Public Private Partnership tali sa Primark planong i-rescind

0
11

Plano kuman sa kagamhanan sa dakbayan sa Surigao na i-rescind an kontrata nga napirmahan tali sa Philippine Primark Properties, Inc. alang sa pagtukod nan isa ka merkado na may mall sa karaang public market.

Sumala pa ni Atty. Cristina Pariñas, City Administrator sa iyang pag-atubang sa session nan Sangguniang Panlungsod niadtong Huwebes, Marso 23, 2023 na an Local Government Unit sa Surigao City maglisod sa pagtuman sa obligasyon sa kontrata.

Apan si City Councilor Cacel Azarcon namahayag na an kontrata nga napirmahan sa City Government tali sa Primark an epektibo sanan binding pa gihapon kuman bisan pa man sa plano nga kini i-rescind.

Ang Primark nagtukod nan temporary public market sa City Boulevard ug niadtong Abril 20, 2022 namalhin an kahamukan sa mga vendors gikan sa karaang merkado.

An kagamhanan sa syudad an mopatuman sa demolisyon nan karaang merkado. Hangtud kuman waya mademolish an old public market bisan pa man kon kini nagkagidlay na, nangalangkat an mga atop tungod sa Bagyong Odette ug hamok nagbitay na mga puthaw nga peligrong may mahuyogan na maniyanggihay. An bag-ong administrasyon sa pagdumala ni City Mayor Paul Dumlao naghanap nan paagi kon unoy marajaw sa mga nagpabiling naninda sa Public Market.

Kahinumduman an miaging administrasyon nagkapirmahay nan “lease and develop” na kontrata tali sa Philippine Primark Properties Inc. na amoy mag-develop sa lugar pagtukod ug tuyo ka andanang building, na may basement parking area, modernong merkado sa ground floor, shopping mall sa second floor ug alfresco sa ikatuyong andana. (RPN DXKS Surigao News Team)

Leave a Reply