Opisyal nga gi ablihan ang Dinagat Isalnds’ Tourism and Agri-Fishery Hub “Bagsakan Center” sa pagpanguna nila Governor Nilo P. Demerey, Jr, MPM, Municipal Mayor Alfred Coro II ug Provincial Agriculturist Rico Galinato pamaagi sa usa ka mass blessing ug cutting of ribbon ceremony sa Munisipyo sa Del Carmen, Siargao Islands.
Ang Bagsakan Center sa Del Carmen ang mahimong butanganan sa mga produkto nga mugikan sa Dinagat Islands padulong sa Del Carmen, Siargao Islands. Kini subay sa suporta nga gusto ipaabot ni Governor Demerey ngadto sa Munisipyo sa Del Carmen pamaagi sa pagpadala sa mga sobra nga agricultural crops ug uban pa ngadto sa ilaha.
Matod pa ni Demerey Jr., sinugdanan ra kini sa mga programa nga nagtumong nga pakusgan ang relasyon sa Dinagat Islands ug Isla sa Siargao pinaagi sa suporta ug pag pakusog sa Agro-Tourism sectors. Mapasalamaton usab siya sa tanang taga Del Carmen sa pagpangulo ni Mayor Coro sa ilang mainiton nga pagsugat kanila ngadto sa Del Carmen port.
Mapasalamaton usab si Mayor Alfredo Coro II ngadto kang Gobernador Demerey ug Mayor Marc Longos alang sa kalampusan sa maong proyekto nga ilang gilunsad para sa duha ka mga isla. Siya usab nipaabot og pasalamat sa tanang nakig-uban kanila og nihatag og oras aron saksihan ang maong makasaysayang higayon.
Hugot nga nigarantiya ang duha ka mga isla nga sila magtinabangay aron mapun-an ang ilang mga pangahinglanon sa aspeto sa pagkaon ug turismo. Nahimo usab kini nga mitsa para sa mas maayo ug mahinungdanon nga relasyon para sa duha ka mga isla. (Mark James Lisondra)
(Source: Dinagat Island PIO)
