Dapa, Surigao del Norte – An Dapa Municipal Police Station ug Socorro Municipal Police nag served nan warrant of arrest kagahapong adlawa batok sa duha ka wanted person.
Si Police Colonel Laudemer M Laude, niila sa akusado na 34 anyos, layaki, residente sa Purok-1, Barangay 13, lungsod sa Poblacion Dapa, ug 54 anyos, layaki, menyo, mag-uuma, residente sa Barangay Urbiztondo, lungsod sa Claver.
An 34 anyos na layaki na akusado na taga lungsod sa Dapa nasikop alas 5:00 sa buntag kagahapong adlawa sa Purok 1, Barangay 13, lungsod sa Poblacion, Dapa tungod sa paglapas sa Presidential Decree Number 1602 sa illegal gambling activity ubos sa Criminal Case No. 1128.
An Municipal Circuit Trial Court, 10th Judicial Region, Dapa-Socorro, Dapa Surigao del Norte, niisyu nan warrant of arrest sa akusado na pinetsahan ug Pebrero 26, 2024, na may girekomendar na piyansa na Php30,000.00 ka pesos.
Sumaya sa taho gikan sa Dapa MPS, an akusado giingong nalambigit sa illegal na spider-fighting activity jadton Disyembre 10, 2023, sa Purok-13, Poblacion, Dapa.
Dungan niini an malampusong manhunt operation sa Socorro MPS na miresulta sa pagkasikop sa isa ka 54 anyos na layaki na indibidwal sa alas 7:10 sa buntag kagahapong adlawa sa Barangay Doña Helen, lungsod sa Socorro.
An warrant of arrest na gi-isyu sa Regional Trial Court sa Dapa, Surigao del Norte, pinetsahan ug Pebrero 22, 2024 ubos sa criminal case no. 24-16 may kalabotan sa kasong qualified theft na jaoy girekomendar na piyansa na Php10,000.00 alang sa temporaryong kagawasan.
An mga akusado an jaon kuman sa tagsa-tagsa ka mga MPS. (Ronda 21 Mark James Lisondra, photo courtesy of PPO SDN)