Napalgang waya nay kinabuhi an 24 anyos nga layaki sa gipuy.anan sa So Compound, Purok 1, Sitio Looc, Brgy. Luna, SC sa alas 4:30 nan hapon.
Nakilay.an an patay’ng lawas nga si Jaybert Aporias Cutanda, 24 anyos, layaki, trabahante sa Laogo Animal Hospital sa Borromeo St., Surigao City, lumad nga taga Brgy. Navarro, Basilisa, Dinagat Islands.
Nasayran mga alas 5:00 sa hapon sa nakadawat ug impormasyon an Surigao City Police pinaagi sa tawag sa cellular phone gikan sa isa ka concerned citizen, nga nagpahibayo nga jaoy isa ka giingong layaki nga patayng lawas nga nakit-an nga waya nay kinabuhi, nagbuy-od sa sayog suyod sa ija boarding house sa So Compound nga gipanag-ijahan ni Mr. Harnel Mahusay So.
Human nadawat an taho, an mga personahe sa Surigao City Police Station nakig-alayon sa SOCO Surigao ug dali niresponde sa nahitaboan. Gikordon ug giproseso sa responding team an lugar.
Sa imbestigasyon ni PMSgt. Jacknor Semeniano nasayran nga jadton gabii sa waya pa namatay an biktima, gikan nag duwa nan basketball an biktima ug human sa duwa nag-inom nan ilimnong makahubog ug amo na adto an katapusang nakit.an an biktima.
An Investigator On Case nga si PMSg Jacknor G Semeniano nag requesrt nan Post Mortem Examination sa City Health Office para mahibaw-an an hinungdan sa kamatayon sa biktima.
Sa inisyal nga imbestigasyon sa SOCO nasayran nga wayay nakit.ang timailhan nga foul play. An namatay jaon karon gihaya sa Nilo Funeral Services nga nahimutang sa KM2, Brgy. Luna, Surigao City. (Mark James Lisondra)