Patay an 22 anyos nga layaki nga si Mark Paul Velarde kinsa residente sa Purok Pag Asa, Brgy. Washington, SC human kini gibuno sa suspek nga si Juncil Barios Elsisura, 27 anyos, ulitawo, residente sa Sitio Looc, Brgy. Luna, SC.
Nahitabo an krimen mga alas 12:20 kagainang kadlawon sa may Narciso kanto Borromeo St., Brgy. Taft, SC nga diin gidaya pa an biktima sa Caraga Regional Hosptal apan waya nay kinabuhi.
Sa imbestigasyon ni PSSgt. Joen Zabala nasayran nga an maong biktima naka angkon nan samad dinunggaban ka tuyo sa ija dubdub nga miresulta sa ija hinanaling kamatayon. Sumaya pa sa mga nakasaksi nga an biktima iban sa ija mga higala nagpalit nan imnonon sa Marilou Store ug sa dihang an suspek kalit nitunga sa likod ug sa wayay pag duha-duha gibuno an biktima.
Human sa krimen dali misibat an suspek sakay sa motorsiklo pasingod sa City Boulevard ug ni ambak sa dagat dajun nilangoy palajo. Apan isa ka hot pursuit operation an gihimo sa mga tinugayanan sa kapulisan iban sa koordinasyon sa Philippine Coastguard SDN nagmalampusong nasikop an suspek.
Na rekober sa crime scene an ice pick nga gigamit sa krimen nga may sukod sa 9 ka pulgada an katas.on lakip an kuptanan.
Dugang pa sa imbestigasyon ngadto sa suspek nga personal nga pagdumot an motibo sa krimen. Sa pagka kuman an suspek an jaon sa kustodiya sa Surigao City Police Station alang sa inquest proceedings. (Mark James Lisondra, Ronda 21)