Nakabsan sa kinabuhi an isa ka 16 anyos nga layaki human kini nakit.an nga nag lutaw-lutaw sa Baoy River sa Purok 1, Brgy. Villaflor, Gigaquit, SDN kagaina Hunyo 10, 2024 sa alas 2:45 nan hapon.
Nakilay.an biktima nga si Leonard Piosang Escabal, 16 anyos nga layaki, ulitawo, residente sa nahisgutang lugar.
Basi sa imbestigasyon ni PSSgt. Jetsam Lingatong nasayran nga nag-inom an biktima iban sa ija pamilya isip pagselebrar sa adlawng natawhan sa ija amahan jadton Hunyo 9, 2024.
Mga alas 5:00 sa hapon sa samang petsa, an biktima nangayo ug pagtugot sa ija mga ginikanan nga moadto sa Sitio Tayawod, Daywan, Claver, Surigao del Norte nga nahimutang tabok sa suba sa nasangpit nga lugar sa insidente.
Sumaya pa sa inahan sa biktima nga an ija anak ubos sa impluwensiya sa ilimnon maka hubog ug amo an katapusan nga nakit.an sa ija ginikanan nga buhi ug pagka alas 2:45 sa hapon Hunyo 10, 2024 nakit.an nga waya nay kinabuhi an biktima nga nag lutaw sa nahisgutang suba.
Nag request na isab nan Post Mortem Examination an Duty Investigator ngadto na sa Rural Health Unit sa lungsod nan Gigaquit. Sa latest update an patay’ng lawas sa biktima an jaon nakahaya kuman sa Mata funeral Homes nahimutang sa Brgy. Daywan, Claver, Surigao del Norte. (Mark James Lisondra)