Dako ang kalipay sa linibo ka mga BHW kon barangay health workers sa entiro Sarangani Province tungod sa singkwenta (50) kilos bugas nga ilang nadawat matag usa gikan sa Provincial Government sa Sarangani sa pamunuan ni Governor Steve Chiongbian Solon.
Sayo nga naka-angkon og Pinaskuhan ang mga kwalipikadong BHW sa pagpanguna sa ilang BHW provincial federation president Merly Nebres, lakip na mga BNS/barangay nutrition scholar ug mga municipal health-hospital worker, sa tibuok probinsya sa Sarangani tungod sayo nahatag kanila ang maong mga sinakong premium rice, sa pag-asikaso nila Assistant Provincial Administrator Engr. Gerald Faciol, Provincial Health Officer Dr. Arvin Alejandro, ug sa Sangguniang Panlalawigan nila Vice Governor Elmer De Peralta, Board Member Joseph Calanao, Board Member Irish Arnado ug tanang board member.
Pagpasalamat kini sa Kapitolyo sa Sarangani sa paghago nga mahatud sa mga kabarangayan ug ka-sityuhan ang mga programa sa maayong panglawas sa gobyerno ug sa pag-alalay sa mga medical frontliner nga dili mudaghan ang matakdan sa Coronavirus.
Pinaagi sa serbisyo sa BHW, wala naglisod ang Provincial Health Office ug mga municipal health office nga mag-una ang Sarangani sa entiro Rehiyon Dose nga labing daghan ang nabakunahan nga mga kabataan batok tipdas ug polio karong tuiga.
Samtang sa hisgutan nga COVID-19, dakog papel gihapon ang mga BHW tungod sila ang naglangkob sa BHERT kon Barangay Health Emergency Response Team. Una pa man nakapagawas og kamanduan si DILG Secretary Eduardo Año, dugay na nga na-organisa nila Governor Solon ug Dr. Alejandro ang BHERT sa Sarangani.
Sa datus sa Department of Health Region 12, walay nadungag nga positive case sa COVID-19 sa probinsya sa Sarangani sa nakalabay nga Disyembre 24 ug Disyembre 25, bisperas ug adlaw sa Pasko, inay aduna pay naka-recover sa balatian. Usa (1) lang pud ang natala nga napaso sa paboto nga sparkler sa Pasko, usa ka minor injury lamang subay sa report sa PHO Sarangani, taga-Maitum.
Baynte uno (21) kabuok na karon ang active cases sa Sarangani Province tungod sa trese (13) ka mga indibidwal puros tanan taga-Maitum ang nadungag sa listahan nga naigo sa Coronavirus.
Dise sais (16) kabuok ang active cases sa Maitum as of December 25, duha (2) sa Malungon, duha (2) pud sa Malapatan ug usa (1) sa Maasim. Zero case na wala nay natalang active case sa Alabel, Glan ug Kiamba sa kasamtangan.
Sige og pahimangno si Governor Solon kauban ang pito (7) ka mayor nga dili magkumpyansa tungod posibleng musaka ang ihap sa matakbuyan sa Coronavirus gumikan sa daghang okasyon nga ginapahigayon sa Kapaskuhan ug sa pagsugot sa bag-ong tuig. Gani, nabatyagan na karon ang subling pagsaka sa ihap didto sa Metro Manila.
Gibutyag ni Governor Solon nga sayang ang pagpaningkamot kung karon pa maigo sa COVID-19 nga hapit na ang pagbakuna sa Pilipinas. Dili maayong palihi ug dili lalim ma-quarantine ug ma-isolate samtang gasugat o anaa sa sayong bahin sa bag-ong tuig. Samot na kung mabuthan sa mga paboto ug ubang firecracker ang lawas. Maong amping sa Coronavirus, ug mutuman sa Oplan Iwas Paputok sa gobyerno. (Provincial Information Office – Sarangani)