Aprobado na sa Sangguniang Panlalawigan sa probinsya sa Sarangani ang dungag pondo nga P18.6 Milyones ka pesos alang sa nagpadayong pakigbatok sa Coronavirus Disease. Niaging adlaw nga Hwebes sa special session sa mga board member gidumalahan ni Vice Governor Elmer De Peralta, giduso ni Board Member George Falgui, chairman sa komitiba sa disaster, ang resolusyon nga nag-aproba sa rekomendasyon sa PDRRMC Sarangani alang sa laing P18.6 Milyon nga alokasyon.
Katorse Milyones (P14M) niini ang ihatag sa mga munisipyo sa Sarangani, tag-Dos Milyones (P2M) kada usa alayon sa promisa ni Governor Steve Chiongbian Solon sa pito (7) ka mayor nga padayong mu-ayuda ang Kapitolyo sa Sarangani samtang anaa ang dakong hulga sa COVID-19. Una ng nadawat sa mga mayor ang Usa ka Milyon (P1M) matag lungsod. Kinutlo tanan sa calamity/disaster fund sa probinsya.
Ang nahabiling pondo sobra Kwatro Milyones ka pesos (P4M+) ang gitagana aron madugangan ang mga himan sulod sa Sarangani Provincial Hospital isip usa sa provincial COVID-19 isolation facility (P1.2M). Mupalit pud og analog mobile x-ray machine ang Kapitolyo aron sayo mabal-an kung adunay pneumonia ang usa ka pasyente, pneumonia nga sintomas sa COVID-19 (P1.5M).
May gi-alokar nga emergency relief assistance alang sa mga frontliner (P375K) ug ang para sa dungag kagamitan ug disinfectants alang sa nagpadayon nga pakigbugno sa hulga sa ASF kon African Swine Fever (P1.6M). Dili lang COVID-19 ang giatiman sa mga frontliner nga anaa sa mga checkpoint sa tibuok Sarangani Province kundili apil sa gihapon ang ASF nga nagpabiling bahad sa industriya sa babuyan. Apil dinhi nga budget ang gipangandaman nga pagbalik sa H5N6 avian influenza o bird flu human gikabalita niaging bulan nga may nangamatay na nga mga pugo sa Nueva Ecija didto sa Luzon.
Sa bendisyon sa Ginoo ug sa pagtinabangay sa mga katawhan, nagpabilin nga Coronavirus-free, ASF-free, ug Bird Flu-free ang lalawigan sa Sarangani, sa pagsuporta kana nila Senador Manny ug Congressman Ruel Pacquiao.
Samtang, magpadayon ning semanaha ang pang-apud apod sa cash assistance ilalum sa social amelioration program (SAP) sa DSWD. Unang natagaan niaging semana ang mga kwalipikadong pamilya/household sa lungsod sa Glan, Kiamba ug Malapatan, ug karong mga adlawa laing mga munisipyo napud sa Sarangani ang matagaan.
Sa pikas nga bahin, aprobado na usab ang provincial ordinance giduso ni Board Member Irish Arnado-Beñola, chairwoman sa komitiba sa maayong panglawas, nga nagpahamtang og silot sa mga intensyonal nga dili musul-ot og face mask.
Matud pa ni Board Member Arnado-Beñola, nga usa pud ka lisensyadong nurse, community service ang maabtan sa mga musupak kung dili mugamit og face mask inig gawas sa ilang panimalay. Dili kini matud pa i-tratar nga pagpang-ipit kundili proteksyon lang sa kaugalingon ug sa komunidad gumikan hangtud karon wala pay bakuna nga na-imbento aron mupahunong sa Coronavirus. Pagsuporta kini sa lakang sa gobyerno hilabi na sa DILG ug ni Governor Solon nga mapanalipdan ang pagsulod ug pagkatag sa COVID-19. Dungan gihapon kini sa gipahugtan nga mga palisiya kabahin sa stay at home, physical distancing ug hand washing.
Gimanduan ang tanang pampubliko ug pribadong establisemento nga dili magpasulod og tao kung wala naka-face mask. Tulo (3) ka oras nga community service ang silot sa first offense. Pwedeng ubanan sa violator ang mga taga-barangay magtuyok sa ilang mga purok alang sa awareness campaign aron ipalapnag ang kamahinungdanon sa pagtuman sa mga patakaran sa gobyerno. Kung subli kining makasupak, mahimong lima (5) ka oras na ang iyang community service sulod sa lima (5) ka adlaw.
Gitahasan ang mga kapulisan sa Sarangani Province kauban ang mga force multiplier nga i-implementa kini nga ordinansa sabay sa mga signages nga ipang-instolar nagbawal sa dili pagsul-ob og face mask ma-surgical mask man o improvised home-made mask.
Photos: PIO-PGO-PVGO Sarangani
