Nangrugin ti gobierno a nangipatungpal iti programa a ‘’rice rescue’’ nga inlungalong ni Senador Imee Marcos a maipatungpal tapno matulungan dagiti mannalon nga agmulmula ti pagay ditoy probinsia.
Segun ken ni Provincial Agriculturist Mrs. Norma Lagmay, rinugian ti probinsia ti nagbunag idi Biernes kadagiti nabilagen nga irik wenno dagiti nakasaganan a mapabayo nga irik.
Impatalgedna nga agtultuloyen daytoy a ganuat ti probinsia a panangtulong kadagiti maseknan a mannalon a kas iti napinget a tarigagay ni Gob. Matthew Marcos Manotoc.
Kabayatanna, inpakaammona a ngimmina ti presio ti irik kalpasan a nalayus ti Bicol ken Central Luzon.
Mainaig iti daytoy, imbatadna a karaman ti Ilocos Norte iti paggapoan ti supply ti bagas.
Gapu iti daytoy, ginutigotna dagiti mannalon a saan a mangilaklako iti produktoda nga irik iti nalaka a presio.
Inulitna ti pannawaganna kadagiti ‘’rice traders’’ a saan a manglaklaka iti produkto dagiti mannalon gapu iti panagsasaruno dagiti didigra kas iti tikag ken layus.
Innayonna nga iti agdama ket agur-uray ti 116 a milyon a pisos a pundo ti National Food Authority a paggatang iti irik ken adda ti duapulo ket lma a milyon a pesos nga innayon ti gobernador. (Rosita Macalipis, RPN DZRL Batac Correspondent)
(Source: Office of Sen. Imee Marcos)