Nangisayangkat ti Provincial Government of Ilocos Norte (PGIN), babaen ti Public Employment Services Office (PESO), ken iti pannakitinnulong ti Department of Labor and Employment (DOLE), ti maysa -aldaw a panagsanay a napauluan iti “Revitalizing Talent Management for Workplace Sustainability” tapno ad-adda a mapasayaat ti human resource management ken workplace environment ti pagtrabahuan ditoy probinsia.
Daytoy a programa ti panagsanay ket tinabunuan ti sangagasut ket disi nuebe a pannakabagi manipud kadagiti private companies, business industry, academic institutions, health facilities, manufacturers, mining firms, finance groups, ken dadduma pay. Ti kangrunaan a panggepna ket mangipaay kadagiti lokal a makinkukua iti negosio ken human resource personnel iti pannakaammo ken kinalaing kadagiti tay-ak ti workforce development ken employment facilitation tapno ad-adda a mapasayaat ti aglawlaw iti pagtrabahuan. Iti nasao nga aktibidad ket tinabunuan ni Gobernador Matthew Marcos Manotoc, no sadino nga inyebkasna ti naan-anay a suportana kadagiti gannuat ti panagtrabaho ken panggedan ti DOLE.
Author: April Gonzales
Source PGIN