Dakpan sa hot pursuit operation ang retired BJMP member nga namusil sa police nga mipara kaniya sa Quarantine Control Point didto sa Brgy. Garcia, Sta. Monica, Siargao, Surigao del Norte.
Ang suspect nailhan nga si Reynaldo Martinez Noble, 57 anyos, minyo ug retired BJMP Member nga taga Poblacion 2, Burgos, Surigao del Norte.
Sumala pa ni Police Lieutenant Juan Belarmino, hepe sa kapulisan nga kini nahitabo adtong Biyernes, Mayo 1, 2020 sa pagka alas 4 sa hapon, dihang si PCpl Genuel Diaz Agbayani, 39 anyos nga PNP member, na-assign sa Sta. Monica Municipal Police Station kauban ni Kapitan Imelda Tobias, Barangay Captain sa Brgy. Garcia, nag checkpoint sila sa Quarantine Control Point (QCP). Niining adlawa napailawom na sa General Community Quarantine (GCQ) ang probinsiya basi sa Executive Order No. 12-130 Series of 2020 ni Governor Francisco Matugas.
Niadtong higayona, nakabantay na si Corporal Agbayani sa motorsiklo nga moagi sa checkpoint apan kusog ang dagan. Gipara niya kini apan isog ang rider nga mitubag nga membro siya sa BJMP. Namatikdan sa police nga nakaunom ag suspek maong iya kining gipugngan, diha diha mibalik kini sa iyang agi. Pipila ka minutos nibalik kini sa checkpoint ug didto gipusil makaduha ang police. Nakabantay na ang police ug swerteng nakalikay sa pagpamusil. Misibat ang suspect paingon sa Burgos. Taudtaud nadakpan siya sa kapulisan nga naghot pursuit kaniya sa may alas kuwatro y media sa hapon dihang diha siya sa gawas sa ilang balay sa Poblacion 2. Gisakmit sa kapulisan ang iyang gray sling bag ug didto sa ilawom nakitang may pistola ug duha ka magazine nga may tulo ka bala.
Sa lugar nga didto siya mihimo sa pagpamusil nakit-an usab ang laing duha ka bala ug usa ka basiyo nga bala. Ang suspetsado gidetained sa pagkakaron sa Sta. Monica Municipal Police Station ug mag-atubang sa kasong Attempted Murder. (jc/RPN DXKS)