Nagpadayon ang kagamhanan sa dakbayan nga nagsuporta sa mga programa alang sa kaarangan sa kabatan-onan taliwala sa kasinatian sa pandemya.
Mao kini ang gibutyag ni konsehal Suzette Magtajas-Daba, chairman sa edukasyon, human gipadangat sa Cagayan de Oro Technical Vocational Institute (CDOTVI) ang ilang taho alang sa tuig 2020 sa naangkong kalamboan sa mga benepisyaryo sa tunghaan.
Segun sa taho uban sa pag-abag sa gitanyag nga programa sa Technical Education and Skills Development Authority (TESDA) mokabat sa P714,568.80 ang natunol nga scholarship grant alang Electrical Installation & Maintenance NCII ug Shielded Mental Arc Welding NCI & NCII.
Ang programa adunay 144 ka kwalipikadong aplikante apan 126 ang nakatapos sa napiling mga kurso human walo niini ang nagdrop out.
Sa pagkakaron, ang labing daghan nga mga aplikante naggikan sa Barangay Kauswagan, Lapasan, Tablon, Lumbia, Agusan, Balubal, Bugo, Balulang ug Macasandig samtang aduna usay mga nakapahimulos nga gikan sa gawas sa syudad sama sa Bukidnon, Iligan, Tagoloan ug Villanueva, Misamis Oriental.
Niini, si konsehal Suzette mipasalamat sa kagamhanan sa kanunay nga paghatag og suporta sa mga programa nga gitanyag sa CDOTVI ug miaghat sa kabatan-onan nga magpahimulos sa mga programa tungod kay makatabang kini sa kaugmaran sa ilang kinabuhi. (Sangguniang Panlungsod – CdeO)