Anaa na karon sa recovery state ang Provincial Health Office-MisOr gikan sa pagkahugno sa ilahang building human nga gilamoy kini sa kalayo atol sa nahitabong sunog sa nahimutangan niini sa mismong hawanan sa Kapitolyo Probinsyal niadtong miaging semana.
Hiniusang nagkatimbayayong ang tanang buhatan sa kagamhanang lokal sa Misamis Oriental nga daling miresponde pinaagi sa pagdonar ug pagpahulam sa nagkalain-laing kabtangan nga galamiton kaayo nga sila makapadayon sa paghimo sa ilang mga tahas. Sama nalang sa PPEs, bond papers, office desks, chairs, computer sets, cabinet, ginalong tubig ug water dispenser ug uban pang office essentials.
Si Hazel Ganas, Nurse IV sa PHO- Technical Division isip Planning Coordinator mihisgot sa iyang gasagol nga gibating kasubo ug pasalamat nga bisan sa nasinatiang kalisod, walay nakalas nga kinabuhi o mga kauban nila sa panerbisyo gikan sa panghitabo. Misugilon sab kini nga sa iyang 25 ka tuig na sa PHO, nahimo na niyang ikaduhang balay ang maong buhatan.
Sama ni Gobernador Bambi nakasabot sab sila nga dili angay mahunong ang ilang pagtuman sa gipanumpaang ligdong na panerbisyo busa sa susamang rason mubangon sila og mas mahimo pang better ug best.
“As a public servant ang priority gyod namo sa health is giving the quality services to our people, to the constituents of Misamis Oriental. Although pagsulay ni, kami magkahiusa aron nga mas ma-improve ang among commitment sa lalawigan alang sa tanang programs sama sa maternal care, family planning, mental, dental ug uban pa kay siguradong magpadayon,” sulti ni Planning Coordinator Ganas.
Isa sa prime task gawas sa pagpatuman sa vaccination process mao ang padayong pagplano sa full implementation sa Universal Health Care Law dinhi sa lalawigan kung asa ang tanan nagkanayon nga bisan pa man nga nahurot og kawala ang ilang mga gihaguang researches kini siguradong magpadayon.
“Ang among mga data nawala maong magsugod mi sa scratch kay di man pwede nga tungod nasunog, dili ma-implement ang Universal Health Care ug ang mga technical assistance alang sa tibuok lalawigan sa Misamis Oriental,” dugang pahayag ni Ganas.
Hilabihan sab ang pasalamat sa tanang empleyado ngadto ni Gobernador Bambi tungod sa makanunayong pagsusi niini sa ilang kahimtang ug paghupay sa ilang kahingawa sa ilang naandang office area kaniadto nga maplastar sila sa pagkakaron gamit ang Provincial Training Center.
Giila isip Top Performer ang buhatan sa Provincial Health kung asa daghanan nang pasidungog ang nabalik niini sa lalawigan ug sa maong rason samot sila nahimong inspirado nga mobangon tungod na sa tabang sa mga epektibong lideres susama ni Gobernador Bambi. (Provincial Information Office – MisOr)
