Hangtud kagahapon sa hapon Abril 21, 2021 bisan dagku pa an mga bayud sa lawud sa Malimono sanan San Francisco, naglaum pa an kadagkuan sa Philippine Coast Guard nga duna pay laing mga survivors nga hangtud kuman missing human nadisgrasya an LCT Cebu Great Ocean niadtong Lunes Abril 19, 2021.
Padajon pa gihapon an ila search and rescue operation sa kadagatan sa Surigao del Norte gamit an patrol fast boat, aluminum sanan rubber boat.
Pito pa ang survivors samtang may upat na sa mga tripolante ang nadagsa nga wala nay kinabuhi.
Sa interview exclusive sa RPN DXKS sa 2nd Engineer na si Junmar Galeos, taga Domanjug, Cebu, usa ka adlaw ug tunga sila naglutawlutaw sa lawod adisir siya ug duha ka kauban (patay na adisir nadagsa Chief Engr. Michael Inoc ug Jose Sherwin Laniba) nadagsa sa Brgy. Jubgan gabii sa Abril 20.
Sa wala pa an disgrasya dihang may weather disturbance na nga nakasulod sa Pilipinas, giabisohan na sila sa opisina nga motago sa Nasipit. Apan ang kapitan nga si Mario Palacio wala mosanong sa abiso ug nagpabilin sila sa Swâ (lugar nga didto sila nagpundo) unahan sa Tubay.
Dominggo sa hapon Abril 18 naputol ang ankla sa estrebor, midesisyon ang kapitan na isaka ang pikas angkla sa pabor aron iaway-away na lang ang barko sa dagku na bayud.
Hangtud nadeskobrehan nila nga nagpaingon na sila sa Camiguin. Pagkagabii misaka na ang bayud sa bodega ug sige na motakilid an LCT. An mga apprentice nagsige ug pala sa kargamentong nickel ore aron paghinimbang.
Pagka Lunes sa buntag Abril 19, midisidir sila nga mobalik sa agi aron isadsad kini sa daplin sa baybayon. Dihang gipaliko na nila kini, gihapak na sab sila sa dagkung bayud, misamot pagdaghan ang dagat nga nakapaunlod na dapit sa olin ug mitakilid pag-ayo.
Ang oiler nag abiso sa kapitan nga ihunong ang makina kay basin kan-on sila sa propeller. Nangambak sila apan wala moingon ang kapitan nga “abandon ship” tungod kay niadtong higayona naratol na sila sa pagtoong maunlod kini.
Pagka alas 10 sa buntag Abril 19, nangambak sila apil ang kapitan dala ang mga papeles nga gisulod sa gallon. Hangtud napalayo sila sa LCT Cebu Great Ocean. Wala na sila magtoo nga molutaw pa gihapon kini ug nauna pa diay pagkasangad sa baybayon.
Gamit ang life jackets, gallon ug life rings maoy ilang giabayan. Wala na nila makanaug ang duha ka life rafts nga didto mabutang sa sundeck.
Sa pagkahapon nananghid ang kapitan nga mobiya sa grupo ug mouna paglangoy gamit ang duha ka life jackets ug gallon aron makapangayo ug tabang. Gabii sa Lunes nagtoo sila nga dool na sa isla kay nabati man nila nga may mga babaye nagkantahay ug nangatawa. Apan gianod na sab sila sa suyog ug pirme lambahon sa dagkung bayud. Hangtud pagkabuntag Martes Abril 20, 18 na lang sila ug missing na ang ilang kusinero.
Martes sa buntag Abril 20, ang cellphone sa oiler nga nakabutang sa waterproof phone jacket nagamit nila pagtawag sa ilang opisina sa Cebu aron magpa rescue. Apan hangtud pagkahapon walay rescue nga miabot. Nabasâ sa dagat ang phone ug wala na sila makatawag balik aron makapangayo ug tabang.
Sa sige nilang langoy nagmahayay na nganong miambak sila sa ilang gisakyan. Duha ka apprentice nga ni-survive ang unang nakaabot sa baybayon. Kini mao sila si Noli Labucay ug John Renzo Ganzon.
Nia ang mga survivors:
- Apprentice Noli Labucay – nadagsa sa Brgy. Cayawan, Malimono; admitted sa Malimono District Hospital
- Roger Polo (Chief Mate) – nadagsa sa Brgy. Balite, San Francisco; anaa sa Caraga Regional Hospital
- Arjie Bacarra – nadagsa sa Brgy. Balite, San Franciso; admitted sa Caraga Regional Hospital
- Joejie Villanueva – nadagsa sa Brgy. Balite, San Franciso; admitted sa Caraga Regional Hospital
- Felipe Quebuen – admitted sa Caraga Regional Hospital
- Apprentice John Renzo Guanzon – gidala sa Malimono PNP Station sa nakabangal kaniya nga residente sa Malimono; admitted sa Malimono District Hospital
- 2nd Engineer Junmar Galeos – nadagsa sa Brgy. Jubgan, San Francisco; admitted sa Malimono District Hospital
Mga nakabsan sa kinabuhi:
- Electrician Norman Galon – nakit-an sa baybayon sa Brgy. Balite, San Franciso; gihaya karon sa Nilo Funeral Services
- Chief Engineer Michael Inoc – nakit-an sa shoreline sa Brgy. Jubgan, San Francisco; gihaya karon sa Aldonza Funeral Homes
- Oiler Jose Sherwin Laniba – nakit-an sa shoreline sa Brgy. Jubgan, San Francisco; gihaya karon sa Aldonza Funeral Homes
- Clearing Officer Mark Evan Cuesta – nadagsa sa baybayon sa Brgy. Mabua, Surigao City; gihaya karon sa Aldonza Funeral Homes
Missing crews:
(as of April 21, 2021)
- Capt. Mario Palacio
- Marvin Lusica
- Oiler Lemuel S. Dadivas
- Oiler Mark Louie Masibag
- Vincent dela Peña
- Jaydee Juntilla
- Mark Suarez
- Raneso Macapaz
- Clint B. Auxtero
Any information please inform the nearest Local Government Unit, Police Station or Philippine Coast Guard.
Ang PCG sanan PNP – Maritime Group padajon sa search and rescue (SAR) operations aron pangitaon ang uban pang missing crew members. May nagpatrolya usab sa Malimono ug San Francisco.
Ang Provincial Disaster Risk Reduction and Management Office (PDRRMO) sa Surigao del Norte nag deploy nan drone, samtang ang tag-iya sa LCT CEBU GREAT OCEAN nagdeploy ug private plane alang sa aerial survey sa kadagatan sa Malimono ug San Francisco.
Sa Malimono District Hospital, gipahayag ni Dr. Maria Kareen Gemao-Pepito na naka dextrose sanan giasistihan nila ang tulo ka mga survivors nga admitted sa male ward.
(Exclusive interview by Shela Salar with SM Jun Clerigo RPN DXKS)
Note: Dugang detalye sa mga survivors mabati ug makita sa Radyo Ronda Balita 6:00 AM
All pictures exclusive of RPN DXKS Surigao. Copying is free on fb but please acknowledge the original owner.