Impasigurado ni Mayor Remigio Medrano ti ili a Sarrat a tingitingen ti gobierno municipal no rumbeng a maipaayan ti tulongdagiti agkakapamilia iti Brgy. 9 ti nadakamat ngaili a nagpositibo ti COVID-19.
Impalgakna a ti napateg kadagitoy a gundaway ket ti pannakaipadalan dagiti kakailianda a nakapulapol dagiti nagpositibo iti immu-na a gundaway iti RT PCR test.
Imbatadna a maikadua laeng a panpanunutenda iti agdama ti pakaseknan ti pinansial ken ti kapatgan ket malapdan ti panagwaras ti nasao a sakit ken ti pannakaisigurado a masaluadan ti salun-at dagiti umili.
Mangnamnama ti mayor a tumulong ti gobierno probinsial iti daytoy a problema ti ili a Sarrat agsipud ta maysa ti salun-at kadagiti kangrunaan a programa ni Gob. Matthew Marcos Manotoc.
Maipalagip nga impadanon metten ti gobernador ti pannakaseknanna iti bigla nga iyaadu ti bilang dagiti nagpositibo ti COVID-19 iti ili a Sarrat.
Kagiddan daytoy, nagapela kadagiti kakailian iti saan a panang-discriminate wenno panangilanglangi kadagiti umili ti nadakamat nga ili gapu iti kaadu dagiti nagpositibo a kalugaranda. (Irene Ringor, RPN DZRL Batac Correspondent)
(Source: Provincial Government of Ilocos Norte/ Communications & Media Office)