Posible nga masugdan na ang pagtukod sa Integrated Steel Mill sulod sa property sa PHIVIDEC Industrial Estate karong tuiga.
Kini human mibisita sa PHIVIDEC ang Project director sa Panhua Group miaging adlaw gikan pa sa nasud sa China nga si Mr. Xiao Guiyang ug mipakita sa ilang plano atubangan mismo ni administrator Pompee La Viña.
Gibutyag ni Mr. Xiao nga tulo ka tuig na ang milabay dihang una silang mibisita sa PHIVIDEC aron ipakita ang ilang plano apan wala kini aprubabi sa miaging administrador tungod kay wala man sila nagkasinabot.
Gipasabot pa ni Mr. Xiao nga nanginahanglan sila sa mokabat 10 tawsan cubic meter per hour nga tubig ug 150 hangtud 200 tawsan Kilowatt per hour nga supply sa kuryente.
Ang pagatukoron nga steel mill mamahimong magmugna sa 8 million tons ka flat products sulod lang sa usa ka tuig. Dugang pa ni Xiao nga kung mapirmahan na ang kontrata, diretso nilang sugdan ang pagtukod sa steel mill ug manginahanglan sila sa mokabat 10 tawsan ka construction worker.
Sa karon gihulatan na lang ang presyo sa tubig nga i- provide sa PHIVIDEC ngadto sa industriya sa puthaw lakip na ang presyo sa kuryente nga ihatag mismo sa CEPALCO una sila mopadayon sa uban pang mga lakang.
Ang mga raw materials nga gamiton sa industriya mamahimong paliton dinhi sa Pilipinas ug mamahimo usab nga maggikan sa ubang mga nasud.
Samtang, matud ni administrator La Viña, trabaho sa PHIVIDEC nga mohatag og trabaho sa katawhan.
Kini ang rason nganung kanunay silang nagaaghat sa mga locators nga mosulod sa PHIVIDEC Estate alang sa dugang trabaho nga matanyag sa katawhan.
Gisiguro usab ni La Viña nga kung masugdan na ang pagtukod sa Integrated Steel Mill, unahon pagpasulod sa trabaho ang mga local workers gikan dinhi sa Cagayan de Oro, Misamis Oriental ug sa entiro Northern Mindanao.
Mahinumduman nga ang Integrated Steel Mill posibleng magmugna sa 30 tawsan direct jobs ug 70 tawsan multiplier effect. (Office of Phividec Administrator)