Gibutyag ni Engineer Gerald Faciol, ang assistant provincial administrator sa probinsya sa Sarangani, nga laing dungog na usab sa Sarangani Province ug sa pamunuan ni Governor Steve Chiongbian Solon, nga subling bisitahan sunod bulan via virtual visit sa mga kadagkuan sa World Bank taliwala sa pandemya. Nagpasabot lamang matud pa nga naka-uyon ang taga-World Bank sa pagpatuman sa mga proyekto sa Sarangani basi sa ilang international standard.
Ang World Bank ang international financial institution nga maoy funding agency sa programang PRDP kon Philippine Rural Development Program katugbang ang Department of Agriculture. Gawas sa pagpasemento sa mga nag-unang provincial road sa kabukiran sa Sarangani, anaa pud ang PRDP nagatabang sa pagpabarog og mga planta ug sa pagpalambo sa produktong pang-agrikultura, sama sa abaca fiber, virgin coconut oil, cacao o tablea ug tibuok lubi kaabag ang mga kahugpungan sa mag-uuma.
Sa talaan sa Sarangani Provincial Planning and Development Office, hapit P900 Milyon ka pesos na ang nabubo nga pondo sa PRDP sa probinsya sa Sarangani. Segun ni Regional Director Arlan Mangelen sa Department of Agriculture Region 12, anaa ang ilang opisina padayong nakig-alayon sa buhatan ni Governor Solon. Sa karon, may bag-ong na-aprobahan napud matud pa sila nga pondo sa Department of Agriculture sobra P300 Milyon ka pesos alang sa padayong pagpalambo sa farm-to-market road sa Sarangani, gawas sa SAAD upland rice farming program.
May bag-ong grant pud ang EU kon European Union alang gihapon sa mga kaigsoonang lumad ilalum gihapon sa programa sa PRDP. Gitutukan usab ni RD Mangelen ang halal industry sa mga kaigsoonang Muslim. Ginahikay na ang mga papeles aron mapatindog ang Halal slaughterhouse sa probinsya sa Sarangani nga pwedeng pang-export ang mga produkto.
(Provincial Information Office – Sarangani)