Cebu City – Gituhoan nga personal nga away o bahin sa negosyo ang motibo sa pagbanhig-patay sa usa ka negosyanteng babaye dili layo sa grahean sa iyang sakyanan sa Gabutan compound, Brgy. Guadalupe, Cebu City samilabay ng gabii.
Nailhan ang gipatay nga si Grace Gabutan, 34, nga giingong buwag na sa iyang bana pinaagi sa annulment.
Si Captain Janelito Marquez, hepe sa Guadalupe Police Station, miingon nga luwan sa iyang awto si Gabutan ug paingon nang mosud sa grahean dihang mibutho ang duha ka tawong nagmotorsiklo dayong pusil kaniya.
Human masuta nga ilang naigo ang biktima daling mibiya ang mga namusil.
Ang mga sakop sa SOCO o Scene of the Crime Operation nakakuha og tulo ka kabhang sa bala sa.45 kalibreng pistola sa dapit-nahitaboan.
Matod ni Marquez, wala na mada sa ospital si Grace Gabutan tungod sa grabeng pinusilan nga iyang naangkon.
Hinuon, gitataw sa hepe nga wala pa sila masayod unsay negosyo sa biktima sanglit wa pa makigsulti nila ang mga kabanay ug ila lang usab gisabot kay anaa pa man kini sa kaguol ug pagbangotan sa kalit nga hitabo.
Gisalikway ni Marquez ang anggulo sa love triangle kay ilang nahibaw-an nga wa man kini karelasyon. (Jhon Tadlip/JTY)
(Source & photo courtesy of Guadalupe Police Station)