Iriga City- Nagpaluwas nang abiso an sektor nin transporte sa Bicol na maparticipar sinda sa pang nasyonal na juelga na Alyansa Kontra PUV Phase-Out sa maabot na Septiembre 30 nganing ipaheling ki Presidente Rodrigo Duterte, DOTR, asin LTFRB an saindang panindugan kontra sa Public Utility Vehicle Modernization Program (PUVMP).
An grupo nabilog matapos magkasararo an mga National Transport Groups, Transport Coalition, asin an mga Local Transport Groups, sa pangenot kan PISTON, ACTO, STOP and GO, STOP, NTJPOC, MTC. An alyansa may katuyohan na atubangon asin iprotesta an planong jeepney phase-out puon sa Hulyo 1, 2020 base sa plano kan DOTR asin LTFRB.
Si Joel Pellogo, lider kan Condor-Piston sa Camarines Sur nagpahayag na nag-aandam na an saindang sektor nin huli ta an PUVMP dai man makakatabang sa mga operator envez mawawaran nin hanap buhay kadamay pa an mga chofer mientras na mayong kakayahan an saradit na operator kan dakulang cantidad kan sasakyan Euro-4 na iyo an iriribay sa dating mga pampasajerong jeepney.
An saindang lider sa Metro Manila asin iba pang rehiyon nagpahayag na nin suporta asin masabay sa pang nasyonal na juelga, segun pa sa Condor-Piston.
Nag-aabot sa P1.9 hasta P2.2 milyon an cantidad kan Euro–4 na dai kakayahon kan mga saradit na operator na makabakal kaini dawa pa hulogan, sabi pa ni Pellogo.
Enot nang pigpahayag kaidto ni Presidente Duterte na iimplementar na kan Enero 1, 2019 an jeepney phase-out alagad sinuspende muna kan Senado asin nagpatanid si LTFRB Chairman Martin Delga na iimplementar na an PUVMP sa Hulyo 1, 2020.
Sinabi pa ni Pellogo dawa kabali na sa programa kan gobierno an pagpapautang tanganing tabangan na makabakal an ordinaryong operator alagad kaparejas halabaon an proceso huli kan kadakul na rekisitos.
Saro sa mga dapat gibohon iyo an pagbilog nin mga cooperativa na magtitindog na korporasyon na magseserbing fleet management asin pakatapos kaini kaipuhan isuko sa LTFRB an franquicia kan lomang jeepney asin para makakua nin sarong unit na kaipuhan an cinco por cientong down payment asin an natatada huhulogan sa bangko nin 6 por cientong interes cada taon.
Pigbuyagyag pa tanganing makautang sa bangko asin tatabangan na makapag-operate an sarong cooperativa dapat igwa muna nin P10 milyon na fondo bilang collateral sa uutangon sa bangko asin bilang kapital para sa operasyon.
Tatawan pa nin pagabat na obligasyon an mga cooperativa na mag-arkila nin mahiwas na pribadong maysadiri kan mga terminal. Oras marealisar an PUVMP, ciertong magpaparalangkaw an singil sa flete nganing seguradohon kan mga kapitalista na makakabuelta an dakulang kapital na nilaog sa negosyon ini, dagdag pang mga pahayag ni Pellogo.
M. Barayoga