Baao, Camarines Sur — Natuyawan kan Sangguniang Bayan kan Baao an nagluluyang serbisyo kan Baao Water District sa nagtalikod na bulan matapos na mag-asumir sa puwesto an bagong General Manager kasalida kan suspendidong General Manager na si Vic Robosa.
Ini matapos na imbitaran sa session regular kan Sangguniang Bayan an nagtutukaw na kasalida ni Robosa na si OIC Hazel Ilao.
Tinaw’an nin duon ni konsejal Edwin Bedural na maski bakong pick-hour, mayo nin tubig na nagluluwas sa saindang gripo na ngunian sana nangyari.
Nagluwas pa sa session na igua nin diperensya an apat na pumping station kan Baao Water District na iyo an rason kaya nawawaran nin tubig an ibang barangay.
Pinagkuwestyon pa kan sangguniang bayan kan Baao an kontrata sa Tubig Nabua kun sain nasasakripisyo lugod an interes kan mga konsumidor kan Baao.
Katakod kaini, nagpromisa si Ilao na antes na matapos an taon na presente, cierto na an toltol na supply nin tubig kan Baao Water District oras na matapos an maintenance kan pirang pumping station asin turn over kan duwa pang iba na nagkaigua nin problema durante kan panahon ni dating GM Vic Robosa.
(Melvin F. Barayoga, RPN DZKI Iriga OIC, photo courtesy of Baao Water District website)
