ANG Cagayan de Oro ang pinakaunang syudad sa tibuok nasud nga nagpahigayon og focus containment o granular lockdown sa pagsugod pa lang sa pandemya sa miaging tuig human nakatatala sa pinakaunang local COVID positive case ang syudad.
Kahinumdoman nga dili momenus 30 ka focus containment o granular lockdowns sa nagkalain-laing barangay ang gihimo sa CDO Emergency Operations Center sa pagpangulo sa City Health Office ug ni Mayor Oscar Moreno sugod Abril 2020 diin naglakip kini sa Pinikitan sa Camaman-an, Zayas ug Macanhan sa Brgy Carmen, Puntod, Macabalan, Agusan, Lapasan, Gusa, Kauswagan, Cugman, Bugo, Balulang, Bayabas ug uban pa.
Gipasabot ni Mayor Moreno nga dili sayon ug daghang challenges ang nasinati sa pag-implementar sa focus containment o granular lockdowns sanglit 24/7 ug 14 days ang pagbantay sa mga sakop sa City Disaster Risk Reduction and Management Department (CDRRMD), kapolisan ug barangay lakip medical personnel sanglit mopugos pa gihapon ang katawhan ilabina ang authorized persons outside of residence (APOR) nga mogawas nga maoy hinungdan sa dili pagsinabtanay.
“Igo pa ba ang kapolisan, CDRRMD personnel ug mga barangay tanod nga magbantay sa ipailawom sa granular lockdown, given sa kadaghan sa mga kaso karon sa syudad?
Kinsa pa man ang magbantay sa checkpoints, curfew ug pag-inspect sa compliance sa minimum public health standards? pasabot ni Mayor Moreno.
Tungod niini, gisugdan sa CDO LGU ang pagmugna og isolation facilities alang sa mga nagpositibo ug sa mga close contacts niini sa tinguha nga dili na mahiapil o maangin pa ang komunidad apan ipailawom na lang kini sa close monitoring sa acute respiratory illness ug severe influenza illness (ARI/SARI) aron ma-detect ug ma-tambalan gilayon o ba kaha iapil pag-isolate.
Sa maong paagi, daghang mga syudad diin lakip ang Butuan ug Iligan ang nagtuon ug migamit usab sa focus containment nga pamaagi.
Dugang sa mayor, ang pagpailawom sa granular lockdown sa milabay’ng tuig adunay pagtugot sa regional IATF. (Source: City Hall Press Briefing)