Iriga City — Nag-apilar si Ako Bicol Partylist (AKB) Cong. Alfredo Garbin Jr, sa IATF asin sa mga ahensya de gobierno na yaon sa public utilities na suspendiron na nguna an saindang disconnection sa mga dai nakakabayad na konsumidor.
An pahayag kan kongresista kabali na an mga dai nakakabayad nin arkila asin iba pang mga utang.
Sigun sa saiya, kadakol an mga Pilipino an nawaran nin trabaho sa panahon nin pandemya sa Covid-19 na dapat sanang matabangan imbes na pasakitan.
Nangapudan man siya sa mga lending companies na tugutan na nguna an pagpapalawig sa pagbayad nin utang O kaya pa dikit-dikit na pagbayad kaini huli sa “prudence asin compassion” na iyo an dapat mangyari ngunian na panahon.
An nasabing pangapudan susog naman sa pagpapalawig ni Pres. Rodrigo Duterte sa State of Calamity sa nasyon nin sarong taon sa pinirmahan kaining proklamasyon no.1021 na petsado Setyembre 13 presenting taon.
Kun masusunod an pangapudan kan kongresista, madurar an moratorium nin hasta sa Enero 2021.
(Source: Ako Bicol Party list)