Cebu News-Nakig-partner ang Kapitolyo sa tulo ka banko aron pagbubo og 20 bilyones pesos nga pundo sa mga mag-uuma ug mananagat alang sa countryside development ug pagkab-ot sa self-sufficiency sa panginahanglan sa pagkaon sa lalawigan
Sa usa ka news release, si Gob. Gwendolyn Garcia nakigtagbo sa kadagkoan sa Land Bank of the Philippines, Development Bank of the Philippines, ug Veteran’s Bank sa milabayng semana para pagtuki sa plano sa probinsiya pagtakli ngadto sa ECD o “enhanced countryside development.”
Ang tulo ka banko miuyon pag-umol og common fund nga mosuporta sa ECD.
Sa sayo pa, miingon si Garcia nga ang lalawigan mo-shift sa economic focus niini sa countryside development aron paghatag og trabaho sa kalungsoran ug self-sufficiency sa food production isip kabahin sa “new normal” human maapektahi sa coronavirus disease o COVID-19 pandemic ang ekonomiya sa Sugbo ilabi na sa natad sa turismo.
Niadtong Huwebes, Mayo 21, si Garcia ug mga opisyal sa tulo ka banko nagkauyon sa pasiunang pundo nga P20 bilyones.
Mi-quote sa gisulti sa gobernadora, ang PIO o public information office sa Kapitolyo miingon nga ang pundo iapod-apod sa gitawag og marginalized farmers, small ug medium farm organizations, ug large agriculture enterprises.