General Santos City – Giawhag ni General Santos City Mayor Ronnel Rivera ang tanang negosyo ug establisyemento sa siyudad nga hatagan og prayoridad sa pag-atiman ang mga kostumer nga nakahuman na sa ilahang Covid-19 vaccine.
Subay sa bago niining kamanduan ilawom sa Executive Order No. 39, gi-engganyo sa mayor ang mga business establishments sa paghatag og “special preference” sa mga kostumer o kliyente nga adunay mapakitang vaccination card, diin, pamatuod nga kumpleto na kini sa bakuna.
Girekomenda pa sa city chief executive ang pagmuntar og “C” sa maong mga indibiduwal.
“They are encouraged to give special preference to customers/clients which could present their Covid-19 Vaccination Card proving their being already inoculated like providing special lane for these individuals, etc.,” ang tipik sa maong EO.
Sa maong EO, giawhag usab sa opisyal ang tanan nga suportahan ang vaccination program sa city government.
Base sa September 15 vaccine statistics sa siyudad, gikan sa 169,737 nga nabakunahan sa GenSan, anaa sa 64,369 pa lamang ang naka-kumpleto na sa ilahang vaccine doses.