Malipayon nga gidawat sa Muslim community sa entiro probinsya sa Sarangani, hilabi na sa sektor sa mga kababaihang Moro, mga imam, Madaris ustadz facilitators, Muslim elders ug uban pang hut-ong sa mga kaigsoonang Moro nga partner sa Sulong Kapayapaan peace and development program, ang mga Halal nga karneng kanding ug baka alayon sa bala-anong kasaulugan sa Eid’l Adha.
Kagahapong adlawa, adlaw nga Huwebes, natapos ang tulo (3) ka adlaw nga pang-apud apod sa maong mga Halal nga karne gipangunahan mismo sa opisina ni Governor Steve Chiongbian Solon.
Segun ni Ms. Asma Akmad, convenor sa Governor’s Commission on Moro Affairs sa Gobernador, mapasalamaton og dako matud pa si Governor Solon gumikan taliwala sa nagpadayon nga Coronavirus pandemic, napili na usab ang probinsya sa Sarangani karong tuiga nga benipisyaryo sa programa gitawag nga “Qurban (kur-ban) Project 2021.”
Qurban, pinulungang Arabic nagpasabot nga sacrifice. Pang-apud apod kini og mga sinumbali nga karneng kanding ug baka pagtamod sa Eid’l Adha human sa mga sambayang o pag-ampo.
Ang Eid’l Adha kon Feast of Sacrifice, ang usa sa duha (2) ka dakong selebrasyon sa relihiyong Islam, una ang Eid’l Fitr, nga naghidumdom sa gibuhat ni Propetang Ibrahim, Abraham sa mga Kristyano, nga “great sacrifice” pinaagi sa paghalad ug pagsakripisyo sa iyang anak tungod sa iyang bug-os nga paghigugma, pagsalig ug pagtug-yan ngadto sa Ginoo kang Allah. Inay ang iyang anak nga si Ismael, usa ka karnero ang gihalad human nasukod ug napamatud-an sa Ginoo ang hugot nga pagsalig ni Propetang Ibrahim.
Niaging tuig 2020, ciento uno (101) ka himsog nga mga kanding ug duha (2) ka baka ang gipanagtag libre ngadto sa mga kaigsoonang Muslim sa Sarangani Province. Karong tuiga, nikabat sa ciento katorse (114) kabuok mga kanding ug tulo (3) ka baka ang gipang-apud apod gikan sa buhatan ni Governor Solon ug sa mga kahugpungan sa Muslim professionals nga naka-basi pa sa nasud Singapore kasagaran mga Singaporean national.
Anaa ang grupo ni Doctora Siti Maryam Malinumbay S. Salasal sa Cotabato Inter-Communal Initiative nga maoy ga-donar sa mga baka. Samtang, donasyon usab ang mga kanding gikan sa Halwani Services. Sila tanan ang naka-basi sa Singapore.
Nagpabilin ang Al Ihsan Resource Center, United Youth for Peace and Development (UNYPAD) ug Mindanao State University Gensan nga naga-ayuda sa Halwani Services Singapore sa paghatag og mga Halal nga karne sa kanding, naka-benepisyo apil ang taga-dakbayan sa Heneral Santos.
Sa nakalabay lang nga Disyembre 2020, ni-donar ang Halwani Services og tulo (3) kabuok computer set ug mga printer ngadto sa Madaris program ni Governor Solon. Dako og tabang ang maong kumpletong computer sets sa pagbuhat og mga module alang sa mga batang Moro nga padayong ga-eskwela sa mga Madaris Arabic school sa Sarangani Province.
Una nang nalipay ang Muslim community sa Sarangani niaging bulan sa Mayo tungod wala nihunong ang Kapitolyo sa Sarangani bisan pa sa pandemya sa pag-ayuda panahon sa Ramadan. Mga sinakong bugas ang gipanghatag sa buhatan ni Governor Solon sarang magamit sa ilang kasaulugan sa Eid’l Fitr, sa pagsuporta kana nila Senador Manny ug Congressman Ruel Pacquiao, Vice Governor Elmer De Peralta, tanang board member, mga mayores ug mga barangay kapitanes.
(Source: Provincial Information Office – Sarangani)
