CAGAYAN DE ORO – Gipaalerto ni Mayor Oscar Moreno ang publiko batok sa pagpangilad karon sa mga organisadong grupo sa nasud. Ang maong pahimangno gihimo ni Moreno tapos siya nailad sa grupong Pat Villacorte crime group diin gipangayuan siya sa moabot P1.3 ka milyon ka pesos aron maareglo ang kaso sa iyang anak nga si Sean Moreno kinsa bag-ohay lang nga nabilanggo gumikan sa kasong paghupot ug pagbaligya sa ginadiling druga.
Matud pa ni Moreno iyang gibulgar na kining hinimuan sa grupo nga gipanguluhan ni Ryan Mabborang nga taga North- Cotabato aron mapakgang na ang ilang operasyon. Mismo ang grupo sa CIDG ubos ni Regional Director Police Lt. Col Raymond Ligudin ang nakasikop kang Mabborang uban sa grupo niini.
Si Mabborang nagpatoo nga usa ka kanhi sundalo nga nagdala sa ngalang Police Col Ferdinand Sifuentes sa Camp Alagar ning dakbayan sa iyang pagpangilad kang Moreno sa miaging semana.
Sa nahitabong entrapment operation batok kang Mabborang, gidepensa niini nga napugos siya sa pagpangilkil sa Mayor human sila mailad sa Kabus Padatoon o KAPA-Community Ministry International.
Apan ang maong palusot wa mosalir kang Moreno. Ang mga suspetsado gi-entrap tungod sa ilang pagpangikil kang Moreno sa kapin us aka Milyon ka pesos nga kantidad sa salapi.