Cebu City – Giinsister ni Cebu City Mayor Edgardo ang pag gamit sa halin sa yuta sa SRP o South Road Properties isip tinubdan sa 2021 annual budget.
Gisugyot sa mayor ang paghimong tinubdan sa ₱ 3 bilyon gikan sa nahibiling ₱ 5 bilyon nga pundo sa SRP sales para sa ₱ 10.8 bilyon nga proposed annual budget sa sunod tuig.
Una niini, mihangyo sila si Bise Mayor Michael Rama ug ang ubang konsehal nga dili lang gamiton ang SRP funds kay buot nilang itagana lang kini sa emergency.
Gipasabot ni Labella nga gigamit na niadto ang maong salapi ug gani, ₱ 5 bilyon na lay nahibilin gikan sa ₱ 16 bilyon nga total sales ug walay legal impediment sa paghimo sa ingon.
Matod sa mayor, angay gyod kining gamiton sanglit minos ra og nakolektang buhis ang siyudad tungod sa pandemic.
Ang pundo sa SRP gitagana sa motumaw nga hinanaling panginahanglan sa siyudad hinungdang giinsister ni Labella ang paggamit niini sa budget sa sunod tuig.
Midugang siya nga ang uban ganing LGUs napugos pagpangutang alang sa ilang2021 budget tungod sa pandemya nga nakapahagsa og maayo sa ilang tax collection.
Alang ni Labella, suwerte ang Cebu City nga adunay halin sa luna sa SRP nga mahimong gamiton. (Jhon Tadlip/JTY)
(Source & photo courtesy of Cebu Public Information Office)
