Cagayan de Oro – Mangayo og konsiderasyon si City Mayor Rolando ‘Klarex’ Uy sa Cagayan de Oro Bulk Water Incorporated (COBI) nga dili unta maundang ang pag-supply sa tubig ngadto sa Cagayan de Oro Water District (COWD) aron dili maperwisyo ang mga konsumidor sa dakbayan.
Sa usa ka media interview niadtong Lunes, nabalaka si Mayor Klarex nga dakong perwisyo ang masinatian sa mga konsumidor sa COWD kon ugaling mawala ang supply sa tubig sa COBI, busa, mopadangat siya og apela ngadto sa bulk water supplier aron makonsiderar niini ang balayronon sa COWD.
Nasayran nga mobalor sa P437 milyones matud pa ang bayronon sa Cagayan de Oro Water District ngadto sa Cagayan de Oro Bulk Water Incorporated.
Sa susamang higayon, gihangyo usab ni Mayor Klarex ang COWD board nga dili una magpatuman sa ‘water rate hike’ tungod kay hinay-hinay pang ga-recover o’ gabakod ang ekonomiya sa dakbayan human sa epekto sa COVID-19 pandemic.
Sa pangutana kung ang ‘privatization’ maoy makasulbad sa problema sa COWD, susama sa ubang local government units sa nasud, si Mayor Klarex miingon nga bukas siya sa maong ideya, apan, mag-depende kining tanan sa desisyon sa COWD board.
News and photo courtesy of CIO CDO