Davao City – Gimando na sa lokal nga panggamhanan sa siyudad sa Dabaw ang mandatory vaccination batok Covid-19 ngadto sa tanang empleyado sa City Hall. Kini subay sa Executive Order No. 45 series of 2021 nga gipagula sa LGU Davao diin gimando nga obligado na nga magpabakuna batok Covid-19 ang tanang regular employees o plantilla, job order, contract of service ug volunteers.
Samtang gimanduan usab ang mga Department heads ug Chief of Offices nga kinahanglan gayud nga fully-vaccinated na batok covid-19 ang tanang mga empleyado niini hangtud sa Nobyembre 30 ning kasamtangang tuig.
Ang kinsa mang mga personahe nga wala nabakunahan sa ilang schedule kinahanglan nga mohatag sa ilang written explanation kung nganong napakyas sila nga makapabakuna.
Ang mga regular employees usab nga dili magpabakuna mag-atubang ug suspension hangtud unom ka bulan alang sa first offense ug dismissal ubos sa Section 50 (d) sa 20I7 Rules on Administrative Cases In The Civil Service (2017 RACCS).
Alang usab ngadto sa mga Job Order, Contract of Service, ug Volunteers, dili na sila mahimong prayoridad sa higayon nga ma expire na ang ilahang kontrata o dili na ma-renew ang ilang kontrata.
Hinuon, exempted ang mga trabahante nga dili mabakunahan gumikan sa medical nga hinungdan nga na-endorso usab sa Vaccine Cluster Head ngadto sa Human Resource Management Office (HRMO).
(Source: Davao City Information Office)
