Cebu City – Misangpot sa kamatayon sa managsoon ang giingong lalis nga way hinungdan sa Sitio Bangko, Brgy. Valencia, Dakbayan sa Carcar, Cebu.
Si Cpl. Chuck Dayoha miila sa mga nakalas nga silasi Joven, 48, ug Rocky Faustorella, 46, nga pulos mulupyo sa Sitio Pungtod, Brgy. Valladolid.
Nasayran sa kapolisan nga nahitabo ang pinatyanay sa managsoon niadtong Lunes apan sa miaging adlaw pa nadiskobrehi ang nagbuy-od nilang lawas sud sa gialagaran nilang restobar.
Si Joven ang nagsilbing piniyalan sa patigayon samtang si Rocky ang helper sa rest-house sa Brgy. Valencia.
Matod ni Dayoha, adunay pinusilan ang luyo sa ulo ni Joven ug naigo usab sa bala ang apapangig ni Rocky.
Ang elektrisyan nga si Jun Villegas ang unang nakakita sa patay ng lawas sa managsoong Faustorella diha nga duna unta siyay itaod nga linya sa rest-house.
Suma pa ni Dayoha, pirme lang mabantayan nga mag-away ang duha ug ang uwahi nilang giawayan mao ang asin.
Kataposang nabantayan ang managsoon nga nanag-inom sa restobar apan wala na masuta unsay sunod nga nahitabo.
Ang ubang kawani naghingasoy nga bisan sila mahimuot sa panag-away sa duha nga ilang gihulagway nga morag mga bata dihang gisukmatan sa manghod ang maguwang nga walay lami ang giluto niining sud-an kay kuwang sa asin.
Ang uban nilang giawayan mao ang pag-inisipay sa trabaho.
(Jhon Tadlip/JTY, photo courtesy by Marlowe Chica)
(Source: Carcar City Police Station)