Laoag City – Ibilang ni Gob. Matthew Marcos Manotoc a dakkel a tulong ditoy probinsia ti maipasdek a bodega ti Department of Social Welfare and Development iti Brgy. Camangaan ditoy siudad ti Laoag.
Mainaig iti daytoy, impeksana ti napalaus a panagyamanna iti nadakamat nga ahensia kangrunaanna ken ni Regional Director Marie Angela Gopalan ti DSWD ditoy rehion uno.
Kagiddan daytoy, impadanonna ti panagyamanna ken ni Senador Imee Marcos ken ti agtagikua ti lote a pakaipatakderan ti dua a kadsaaran a pasdek a ni Mr. Virgilio Corpuz.
Mamati ti gobernador a nakapatpateg ti nasao a pasdek nangnangruna ket awan ti makaibaga no kasano pay ti kapaut ti mapaspasaran a pandemia a gubuay ti COVID-19.
Impalgakna nga adda posibilidad nga agpaut pay ti nasao a pandemia rason a kasapulan ti maysa a lugar a natalged a pakaidulinan dagiti nadumaduma a “relief goods”.
Dakkel ti namnamana nga apaman a maipatakder ti nasao a pasdek ket saanton a pagparikutan pay iti pakaipanan dagiti “relief goods” iti nasapa a panagsagana ti probinsia iti isasangbay ti ania man a kalamidad wenno didigra.
Innayon ni Gob. Manotoc a ti nasao a proyekto ket naiget a supsuportaran ti gobierno probinsial.
Mangnamnama nga agtultuloy ti napintas a panagkammayet ti probinsia ken ti DSWD para iti pannakaipaay ti pagsayaatan dagiti kakailian.
(Irene Ringor, RPN DZRL Batac Correspondent)
(Source: Provincial Government of Ilocos Norte)
