Gibutyag ni Mayor Oscar Moreno nga hayan magamit na sa sunod bulan ang kamulong gitukod nga main Covid ward diha sa fourth floor sa Pimentel building sa JR Borja General Hospital.
Kini ang pamahayag sa mayor human gisugdan na kagahapon sa JRBGH ang pag-admit sa mga pasyente nga nagpositibo sa Covid-19 nga diha giplastar sa third floor sa Pimentel building.
Tipik kini sa paningkamot sa administrasyon ni Mayor Moreno nga mabalhin ang mga positibong pasyente nga anaa temporaryong gipahimutang kilid sa main hospital building tungod kay wala nay mga kwuarto nga kasudlan.
Sigun pa sa mayor ang third floor maka-akomodar og dili momenos sa 40 ka mga pasyente, samtang ang main Covid ward sa fourth floor maka-akomodar og 60 kapin ka mga pasyente.
Dugtong pa ni Mayor Moreno nga ang main Covid ward adunay intensive care unit kon ICU, ug adunay mga private rooms ug mechanical ventilators.
Dako ang pasalamat ni Mayor Moreno sa mga inisyatiba ug tukmang aksyon nga gihimo ni Dr. Ramon Moreno, ang Chief of Hospital sa JRBGH, aron lang ma-alibyohan ang sitwasyon tungod sa pagdaghan sa mga pasyente nga natakboyan sa virus.
Gipasabot sa mayor nga dili gayud angay balibaran ang mga pasyente nga modangop sa City Hospital, bisan og dili kini Covid referral hospital, tungod kay puno-puno na usab ang mga private hospitals, ug wala na sila’y laing kadangpan.
Gawas sa third floor Covid ward ug main Covid ward sa fourth floor, gihimo na usab nga Covid annex ward ang TB Pavilion sulod sa JRBGH aron matubag ang kakulangon sa mga kwuarto sa maong ospital alang sa mga Covid patients. (City Information Office)