Giaghat sa Agricultural Productivity Office (APO) ang mga mag-uuma ug mangingisda sa Cagayan de Oro nga magparehistro sa Registry System for Basic Sectors in Agriculture (RSBSA).
Si Acting City Agriculturist Paul Douglas Calingin mipasabot nga ang RSBSA mao ang opisyal nga record sa gobyerno aron mailhan ang tinuod nga mga mag-uuma ug mangingisda gikan sa ilang tagsa-tagsa ka mga lokalidad.
Mga mag-uuma ug mangingisda nga nagpangidaron sa 18 pataas ang pwede magparehistro ug mahimo usab iparehistro ang asawa ug anak nga gatabang sa pag-uma ug pangingisda.
Ang RSBSA mao ang nag-unang basihan aron makakuha og ayuda ug malakip sa mga programa sa gobyerno diin ang mga narehistro niini mao ang prayoridad.
Mao kini ang gigamit sa mga personahi sa APO diha sa pagrehistro sa mga mag-uuma nga naapektuhan sa African Swine Fever (ASF) ug gibasihan sa paghatag og indemnification cash assistance nga ₱ 2,000 gikan sa syudad.
Kini usab ang basihan alang sa laing indemnification cash assistance nga ₱ 5,000 gikan sa Department of Agriculture.
Aron marehistro, moadto lang sa APO ug magdala sa latest 2×2 ID picture, orihinal nga kopya sa titulo sa yuta, kasabutan sa renta sa tag-iya sa yuta o uban pa nga legal nga mga dokumento pagmatuod sa pagpanag-iya sa yuta ug orihinal nga government-issued ID aron mahatagan og form.
Papirmahan sa punong barangay, APO ug sa barangay/city agriculture and fisheries council chairman ug ipasa sa APO ang form, lakip ang mga dokumento diin madawatan usab ang RSBSA enrolment stub aron mahimong kuwalipikadong sa unsa mang programa o kalihokan sa DA o sa syudad.
(City Information Office)