Davao City – Ubay Ubay ka mga pamilya ang naapektuhan sa way undang nga pag ulan niadtong Sabado ug Domigo sa rehiyon onse nga diin grabeng naapektuhan ang Compostela Valley Province. Pinasubay sa talaan gikan sa Provincial Disaster Risk Reduction Management Office, miabot sa 1,146 ka mga pamilya ang namakwit ug temporaryong nagpasilong sa mga Evacuation Center.
Subay sa talaan mokabat sa 16 ka pamilya ang mibakwit sa Mawab, 458 sa Monkayo, 174 sa Laak, 209 ang natala sa Nabunturan, 63 sa Montevista, 178 sa Compostela, 42 sa New Bataan ug 6 ka pamilya sa Maco.
Naguba sab sa pagbaha ang mga Provincial road sa Purok 8, Poblacion, Nabunturan, Sityo Anagase, Casoon road, Purok 5, Rizal National Highway ug Sityo Moria, Banlag, Purok 4, Olaycon National Highway, Purok 3 Sityo Bosquit, Banlag, Sityo Seboley Provincial road, Purok 1A, Mt. Diawata Barangay Road sa Monkayo.
Natigayon sab ang landslide sa National Highway Barangay Tapia, Montevista ug gibaha ang Logdeck Bridge sa lungsod sa Laak ug National Highway sa Salvacion, Mawab apan maagian na kini sa mga motorista.
Duha sab ka panimalay ang giguba sa pagbaha ug landslide usa niini sa Barangay Tapia, Montevista diin mitabon ang bukid sa highway nga miresulta sa pagkakulgot sa biyahe sud sa lima ka oras samtang duha ka mga landslide ang natala sa Barangay Mt. Diwata, Monkayo.
Miguwa sa report sa PDRRMO alas 3:17 sa hapon niadtong Sabado, midahili ang yuta sa Barangay Tapia, Montevista diin namatay si Rommel Gogo human natabunan sa midahili nga yuta. Nagpabiling missing si Krisel Hermosora, 12, nagpuyo sa Purok 5, Sityo Handuromog, Barangay Bayabas, Nabunturan.
Nagtuo ang pamilya sa biktima nga gianod kini sa kusog nga bul-og sa Handuromog river. Midahili sab ang yuta sa Purok 24, Barangay Ngan, Compostela nga gikamatay ni Dennis Pesadilla.