General Santos City: WALA na’y kinabuhing napalgan sulod sa usa ka abandonadong panimalay nga gipanag-iyahan sa pamilyang Malik sa Purok Pandan, Brgy. Labangal, General Santos City ang usa ka lalaki alas-10:00 pasado kaganinang buntag, Desyembre 29, 2024.
Base sa nakuhang Identification Card (ID) sa patay’ng lawas sa maong lalaki gi-ila kini nga si Arthur C. Dela Cerna, 52 anyos, taga- Sampaloc St. Brgy. Dadiangas West, sakop ning dakbayan sa Gensan.
Gitu-ohan sa kapulisan nga ang biktima gipalisdan pag-ayo sa pagpatay tungod naputos sa mga bun-og kinulatahan ang iyang lawas, gihitan ang iyang 2 ka kamot, gisampongan og panapton ang baba ug adunay tima-ilhan sa li-og nga gitu-ok kini hinungdan sa iyang kamatayon.
Una niini, gikatingala sa tag-iya sa panimalay kung nganong abli ang pultahan sa ilang balay nga dugay naman nila kini gi-abandona kay ibaligya. Daku na lamang matud pa ang ilang kahikurat nga adunay patay’ng lawas nga nagbuy-od sulod sa usa ka kwarto sa maong balay.
Ga-imbestiga na karon ang Police Station 2 (Makar PNP) ilalum sa General Santos City Police Office (GSCPO) aron masuta kung kinsa ang mipatay sa biktima ug kung unsa ang motibo niini.