Nagtaop pa sa ulo sa biktima ang kutsilyo nga gigamit pagdunggab kaniya sa iyang nakainom sa dihang gidala sa balay-tambalanan partikular sa Malaybalay Polymedic General Hospital kagabie.
Sa report gikan sa Lantapan Municipal Police Station, nanag-inom matud pa ang biktima ug ang 26 anyos nga suspek partikular sa Purok-2A, Barangay Songco, Lantapan, Bukidnon sa dihang, kalit nalang nga gibato og baso sa biktima ang manghud nga babae sa suspek.
Sa kasuko, didto na gihanggat og sumbagay sa suspek ang biktima nga miresulta sa pagpanunggab.
Nakahiagom og samad-dinunggaban sa ulo ang biktima asa gataop pa ang kutsilyo sa dihang gidala sa hospital.
Luwas ra hinoon matud pa ang kahimtang sa biktima ug gikatakdang ipailawom sa operasyon aron matangtang ang kutsilyong nakataop sa ulo niini.
Boluntaryo usab nga mitahan sa Lantapan Municipal Police Station ang suspetsado alang sa tokmang disposasyon.