Gipadas-og ni konsehal James P. Verduguez nga mopasar og resolusyon nga maghangyo kang President Rodrigo R. Duterte nga ideklarang “special non-working” holiday dinhi sa dakbayan sa Dipolog ang Hulyo 1 ning tuiga.
Kini mao ang gipasupot nga mosyon sa nahisgutan nga konsehal atol sa Privilege Hour sa regular nga sesyon sa Sangguniang Panlungsod sa pagpangulo ni Speaker Pro tempore ug In-coming 2nd District Board Member Atty. Peter Y. Co kagahapong adlawa, Mayo 31 ning tuiga.
Sumala sa batan-ong konsehal, kini aron kahatagan ang mga Dipolognon og higayon nga masaulog ang ika-109 nga kasumaran sa pagkahimugso sa Dipolog isip usa ka munisipyo niadtong tuig 1913. Niini, mahatagan usab og kahigayonan ang kagamhanang lokal uban sa mga kawani nga maselebrar ang mga aktibidades sa 22nd Dipolog P’gsalabuk Festival diin daghanang mga kalihukan ang nakahan-ay aron mahimo kining mabulokon.
Nasayran nga sukad niadtong Abril 29 ning tuiga, aduna nay gipahigayon nga mga indigay alang sa pagsaulog ning maong kalihukan. Kini molungtad hangtod sa Hulyo 1 nga maoy adlaw diin nahimugso ang dakbayan sa Dipolog
(Source: Dipolog City Government Facebook page)