Nagtalinaed nga istrikto dagiti uturidad nga agbanbantay kadagiti amin a border check points kadagiti amin a sumrek iti Ilocos Norte.
Daytoy ti impasingked ni Mr. Ryan Remigio, External affairs consultant ti covid 19 ken mangidaulo iti border check point ti Ilocos norte kalpasan nga adda da pay laeng dagiti aggandat a mangilibas kadagiti kakadua da babaen iti panaglugan da kadagiti van.
Segun kenkuana, agtultuloy ti naiget a panagarisit da kadagiti amin a sumsumrek iti Ilocos Norte no dagitoy ket addaan kadagiti umno a papeles nangnangruna iti negative result iti RT-PCR test.
Kunana a kasapulan nga aramiden da ti istrikto a panagmonitor ken panagcheck point nangruna kadagiti aggapu iti umabagatan a probinsiya a nangato ti kaso da iti covid .
Inlawlawagna a naiget ti pannakikammayet da kadagiti amin a Task Force tapno pagtitinnulungan da nga ipatungpal dagiti paglintegan maipapan iti covid 19 kadagiti amin a borders kas direktiba pay laeng ni Gob. Mathew Marcos Manotoc. Kabayatanna, nagballaag ni Remigio kontra kadagiti kulurom a van nga agbibiahe a dakkel ti maipataw a multa no mapaneknekan nga awan iti permit da manipud iti LTFRB malaksid pay a maimpound ti lugan iti 3 a bulan.
