Sa kabila ng nararanasang mabigat na daloy ng trapiko sa ilang pangunahing kalsada sa Camarines Sur, agad na kumilos ang PNP Bicol, sa pangunguna ni PBGEN ANDRE P DIZON, Regional Director, upang magpatupad ng mga hakbang na layong maibsan ang problema. Bilang bahagi ng kanilang tugon, nagpalabas si RD DIZON ng direktiba na nagtatakda ng pagpapalagay ng mga pulis sa mga lugar kung saan mataas ang posibilidad ng pagsikip ng trapiko, partikular sa mga pangunahing lansangan at intersection.
Upang higit pang matugunan ang suliraning ito, nagsagawa rin ng coordination meeting ang PNP kasama ang mga kinatawan ng Department of Public Works and Highways (DPWH) at Local Government Units (LGUs). Layunin ng pagpupulong na ito na magkaroon ng maayos na pagtutulungan sa pagitan ng mga ahensiya upang mas mabilis at epektibong maipatupad ang mga kinakailangang solusyon.
Kabilang sa mga tinalakay ang mga potensyal na alternatibong ruta, pagpapabuti ng traffic management systems, at agarang pagsasagawa ng road clearing operations sa mga lugar na may sagabal sa kalsada. Bukod dito, ipinanukala rin ang paglalagay ng mga karagdagang signage at traffic enforcers upang mas maging organisado ang daloy ng trapiko.
Ang hakbang na ito ng PNP Bicol ay patunay ng dedikasyon sa pagbibigay ng agarang serbisyo sa publiko at pagtugon sa mga hamon sa komunidad. Sa pamamagitan ng masinsinang koordinasyon sa iba’t ibang sektor, layon nitong mapabuti ang sitwasyon ng trapiko at masigurong ligtas at maginhawa ang paglalakbay ng mga motorista at manlalakbay sa rehiyon lalo na ngayong holiday seasons.
Source: PNP Kasurog Bicol