Camp Miranda, Camarines Sur – Isang kapuri-puri at maingat na isinagawang operasyon ang matagumpay na naipatupad ng Kaogma Cops ng Iriga City Police Station, sa pamumuno ni PLTCOL JERIC DON P. SADIA, ACOP, katuwang ang CDEU/Intel personnel at PDEA ROV Legazpi City, sa bisa ng Search Warrant kaugnay ng paglabag sa RA 9165 bandang 7:45 ng umaga noong Abril 20, 2026 sa Zone 7, Brgy. San Agustin, Iriga City. Ang naturang operasyon ay isinagawa alinsunod sa itinakdang legal na proseso, na may presensya ng insulating witnesses at paggamit ng body-worn cameras bilang pagtiyak ng transparency, accountability, at operational integrity.
Ang suspek na kinilala sa alyas “Pads,” 48 taong gulang, isang tsuper at operator, at residente ng Iriga City, ay kusang ipinaalam ang kanyang mga karapatang konstitusyonal alinsunod sa Miranda Doctrine bago isinagawa ang aktuwal na paghahalughog sa kanyang tirahan. Sa nasabing operasyon, matagumpay na narekober ang mga ipinagbabawal na gamot na sakop ng search warrant, na agad na minarkahan at isinailalim sa imbentaryo sa mismong lugar, sa presensya ng mga saksi at sa ilalim ng masusing dokumentasyon ng dalawang PNP-issued Body Worn Cameras.
Sa isinagawang beripikasyon sa PNP E-System, lumabas na ang nasabing indibidwal ay walang kasalukuyang warrant of arrest ngunit may naunang rekord sa CIRAS kaugnay ng kaparehong paglabag, kung saan siya ay naaresto noong Disyembre 19, 2020 sa isang buy-bust operation at kalaunan ay nahatulan sa pamamagitan ng plea bargaining, at kasalukuyang nasa ilalim ng probation. Ang impormasyong ito ay lalo pang nagpapatibay sa maigting na kampanya ng kapulisan laban sa patuloy na banta ng ilegal na droga sa komunidad.
Ayon kay PCOL Virgilio O. Olalia Jr., Provincial Director ng Camarines Sur PPO, “Ang tagumpay ng Kaogma Cops sa operasyong ito ay sumasalamin sa kanilang walang humpay na dedikasyon sa pagpapatupad ng batas. Ang aming kampanya laban sa ilegal na droga ay nananatiling matatag at walang kinikilingan, na naglalayong pangalagaan ang kaligtasan at kapakanan ng mamamayan sa pamamagitan ng makatarungan at disiplinadong pagpapatupad ng kapayapaan.”
Source: Camarines Sur PPO