Opisyalmente na pong binendisyonan asin ipig-turnover kan ciudad sa Department of Education Naga an ikaduwang classroom building kan San Isidro National High School kasubagong aga, Nobyembre 6, 2023. Ini matapos kan pirang bulan na patrabaho na nagpuon kan Marso ngonian na taon.
An aktibidad pinangenotan ni Mayor Son Legacion kaiba sinda Vice Mayor Nene de Asis asin an miembros kan Sangguniang Panlungsod. Yaon man para magtao nin saiyang mensahe an DepEd Naga Schools Division Superintendent, Dr. Susan S. Collano, CESO V pati man si Mr. Ramon F. Geronimo, Jr., an Principal kan escuelahan. Presente man an faculty, mga empleyado, asin mga estudyante na iyo an magamit kan pasilidad.
“Apwera sa mga pigpapatugdok na eskwelahan, mga school buildings, an pigmamawot ta po talaga, iyo po an mas maihanda kamo na mga kaakian para sa saindong futuro. Aram ta man po baga na nagkakaigwa kita nin mas halangkaw na oportunidad, nin tiyansa, na makipaglaban asin atubangon an ano man na challenge pag-abot kan panahon kun kita po nakatapos na nin pagklase. Iyo po iyan an katuyuhan kun tano kita nag-establisyar nin San Isidro National High School.
Laomon po na dae nagtatapos an suporta sa okasyon na ini. Igwa pa po nin kasunod,” Mayor Son Legacion sa saiyang mensahe.
(Source: Naga City Government)