Davao Oriental – Gumikan sa kalit nga pagsaka sa active cases sa COVID-19 sa munisipyo sa Cateel, gitakdang adunay ipatuman nga intensified restrictions o pag strikto sa mobilisasyon sa maong munisipyo sa musunod nga mga adlaw.
Base sa datos, nisaka sa 20 ang aktibong kaso sa COVID-19 sa munisipyo sa Cateel sulod lamang duha ka adlaw gikan niadtong November 21, 2020. Tungod niini misaka usab ang ihap sa mga close contact apil na ang suspects ug probable cases nga kinahanglan dayon ma-trace.
Ang mga nag positibo gikan pa sa nagkalain-laing barangay — hinungdan nga gikinahanglan na nga magplastar ug intensified restrictions pinaagi sa zoning containment.
Sa pag-uyon sa Provincial Task Force on COVID-19 ug ang Municipal Incident Management Team, adunay himuon nga zoning containment pinaagi sa pag i-install ug nga mga checkpoints sa Philippine National Police sa tulo ka entry/exit points sa munisipyo.
Limitahan usab ang pagsulod ug gawas sa mga katawhan sa munisipyo. Ang mga awtorisadong mga residente lamang ang tugutan makalabas sa ilang panimalay, lakip na ang katong nanginahanglan ug atensyong medikal ug ang kinahanglang mulabas tungod sa emergency.
Kini aron mapadali ang buhaton nga contact tracing ug maundang ang pagkuyanap sa COVID-19 sa munisipyo.
Gitakdang ipatuman ang pag-strikto sa mobilisasyon sa mga katawhan sulod sa 10-14 ka adlaw.
Busa, giawhag ang tanang katawhan sa ilang pagsabot sa sitwasyon. Giawhag ang tanan nga dili usa musulod sa munispyo og dili importante ang katuyoan hilabina ang mga leisure activities.
Ang maong lakang, giimplemenar lamang gumikan sa atong pagpaniguro nga luwas ang tanan sa hulga sa COVID-19. (Public Information Office Davao Oriental)
